Kryetari i Federatës së Futbollit të Kosovës, Agim Ademi, ka folur për të ardhmen e Andi Zeqirit.
Ai e quan të mbyllur çështjen e Zeqirit.
”Andi Zeqiri është futbollist i Kosovës. Unë e kam mbyllur çështjen e përfaqësimit të tij nën fanellën e Kosovës. Andi me vullnetin e tij ka dëgjuar zemrën që i rreh për Kosovën”, deklaroi Ademi për Gazetën Olle.
“Ata janë një familje atdhetare. Përkundër të mirave që iu ka dhënë Zvicra, babai i Andit, Avdiu, është shumë i lumtur që Andi do ta përfaqësojë Kosovën”.
“Andi për Kosovën ka nënshkruar fillimisht në zemër e pastaj në letër. E kemi dërguar dokumentin në Zvicër dhe në FIFA. Tani presim të drejtën t’i bashkohet grupit”.
“Andit i dëshirojmë shumë suksese në klubin e ri në Angli”, shtoi Ademi.
Ndryshe, gjatë ditës së sotme drejtori i Kombëtares së Zvicrës, Pierluigi Tami ka thënë për mediat zvicerane se Zeqiri do të vazhdojë të jetë pjesë e kombëtares së tyre.