Gjatë spektaklit të mbrëmshëm të Big Brother VIP Kosova, një videoklip u transmetua, ku u përmbledhën disa incidente shqetësuese të ndodhur brenda shtëpisë, ku Burimi ka ngacmuar vajzat, sidomos Lelën, duke kaluar në prekje fizike pa pëlqimin e tyre.
Videoja tregon momentet ku vajzat dhe banorët e tjerë e kanë afruar Burimin, duke shpresuar që të mos ndihej i diskriminuar për shkak të shtatit të tij të shkurtë. Megjithatë, situata ka eskaluar kur Burimi ka keqkuptuar këtë afrimitet dhe e ka shfrytëzuar për t’iu afruar vajzave në mënyra të papërshtatshme.
Në një pjesë të videos, Burimi shfaqet duke u arsyetuar se është aty për të krijuar sherre, ndërsa Lela i përgjigjet duke theksuar: “Nuk është sherr të bësh dikujt diçka që nuk e dëshiron, kupto, kupto Burim.”
Lela ka shpjeguar në dhomën e rrëfimit: “Ndonjëherë mendoj që Burimi nuk e kupton që ka një kufi, sepse në fillim e kishim bërë shaka bashkë. Po ashtu, në një episod tjetër kam qenë e prekur nga Burimi, nuk e di nëse e keni vërejtur. Burimi nuk e kupton këtë kufi kur unë nervozohem dhe nuk dua të flas më”.
Në video shihet gjithashtu Burimi duke u shprehur: “Jam duke e bërë lojën, po i nxjerr nga kontrolli, ashtu siç keni bërë edhe ju me të tjerët.”
Në një tjetër rast Lela, duke iu drejtuar Burimit, i kërkon të largohet nga shtrati i saj, por ai nuk e respekton kërkesën e saj. Në vend të kësaj, ai i thotë: “Në rregull, ruaju nga unë. Ti do të jesh banorja e parë që do të dalësh nga unë”.
Lela në dhomën e rrëfimit tregon, ndonëse Burimi është shok i saj, kjo nuk nënkupton se çdo gjë është e pranueshme. Ajo thekson se, si në çdo shoqëri, duhet të respektohen kufijtë edhe në shoqëri.
Po ashtu, Burimi shihet i zhveshur nga pishina, vetëm në një robdeshambër duke iu afruar Sarës dhe duke i kërkuar të lejojë një përqafim, ndërsa Sara, e irrituar, i kërkon të largohet dhe e paralajmëron: “Mos fol me mua, siflet me të tjerat.”
Në dhomën e rrëfimit, Sara ka shpjeguar: “E kam vërejtur lojën e Burimit dhe secila prej vajzave duhet ta menaxhojë atë në mënyrën e saj. Unë nuk dua të vazhdoj këtë lojë dhe kam vendosur kufijtë e mi, që Burimi duhet t’i respektojë. Unë dua të respektoj veten time dhe pretendoj që të tjerët të bëjnë të njëjtën gjë”.
Për sjelljen e Burimit ka pasur edhe reagime negative në rrjete sociale, dukemos u pajtuar me sjelljen e tij. /Telegrafi/
