Sulmi i mbrëmshëm kundër zyrave të Presidencës së Republikës së Kosovës, është një veprim kriminal, i cili përveç cenimit të këtij institucioni, ka për synim të krijoj klimën e pasigurisë tek qytetarët e Kosovës, si dhe të dëmtoj imazhin e shtetit të Kosovës duke i bërë përditshmëri veprimet e këtilla anarkiste, të cilat janë duke ndodhur tash e një kohë në vendin tonë, thuhet në një reagim të kryetarit të Kuvendit të Kosovës, Kadri Veseli.
“Është në interesin e qytetarëve dhe shtetit që mekanizmat ligjorë të sigurisë e drejtësisë të veprojnë shpejt dhe me vendosmëri në zbardhjen e organizatorëve dhe kryesve të këtyre veprimeve të turpshme, të papranueshme dhe të dënueshme. Rendin demokratik dhe ecjen përpara të Republikës së Kosovës nuk do të mund ta ndaloj asgjë, e aq më pak veprime të kësaj natyre”, thuhet në reagimin e tij.
Si Veseli, edhe PDK e quan kriminal sulmin ndaj zyrave të Presidencës. Në reagimin e kësaj partie thuhet se sulmet e tilla synojnë të krijojnë klimën e frikës dhe pasigurisë në shoqëri.
“Partia Demokratike e Kosovës konsideron se veprimet e tilla, po cenojnë vlerat themelore të shtetit tonë dhe janë qartësisht anarkiste. Partia Demokratike e Kosovës, i bën thirrje organeve kompetente që ky akt të ndriçohet sa më shpejt dhe autorët e kësaj vepre të shëmtuar të vihen para drejtësisë”, thuhet në reagimin e këtij subjekti. /Telegrafi/