Magomed Khandaev, një zyrtar i Ministrisë së Mbrojtjes ruse, ka vdekur papritur në moshën 61-vjeçare, njoftuan agjencitë shtetërore të martën.
Khandaev kishte shërbyer si kreu i departamentit të ekzaminimeve shtetërore të Ministrisë së Mbrojtjes së Rusisë që nga qershori 2023.
Ai vlerësohet si një dëshmitar kyç në një skandal të madh korrupsioni që përfshiu ministrinë ruse të mbrojtjes.
Shkaku i vdekjes së tij apo vendi ku vdiq nuk janë bërë të ditur, shkruajnë mediat e huaja, përcjell Telegrafi.
Kreu i distriktit Shamilsky në Republikën e Dagestanit të Rusisë, Magomed Gasanov, ka thënë se trupi i Khandaev u dërgua në qytetin e Makhachkala dhe se ai do të varrosej në fshatin e tij të lindjes, Genta.
Не бойові втрати російських генералів. Сьогодні зранку російські видання повідомляють про “внєзапную смєрть” 61-річного генерала Магомеда Хандаєва, керівника Управління державної експертизи МО #РФ. Хандаєв знаходився в прямому підпорядкуванні заступника міністра оборони РФ Тимура… pic.twitter.com/AiGMkw5sKs
— InformNapalm (@InformNapalm) July 9, 2024
Gazeta ruse Kommersant raportoi se Khandaev ishte një vartës i drejtpërdrejtë i ish-zëvendës ministrit të Mbrojtjes, Timur Ivanov, i cili u arrestua me akuza për korrupsion në prill.
Një numër zyrtarësh të lartë ushtarakë janë arrestuar që nga prilli, duke përfshirë Yuri Kuznetsov, kreun e departamentit të personelit të Ministrisë së Mbrojtjes të Rusisë.
Ndërkohë, Sergei Shoigu u zëvendësua si ministër i Mbrojtjes, pasi mbajti postin për 12 vjet, në një “tronditje” të papritur të departamentit.
Kjo është e fundit në një seri vdekjesh misterioze që përfshijnë figura të shquara ruse që kur forcat e presidentit rus Vladimir Putin pushtuan Ukrainën në shkurt të vitit 2022. /Telegrafi/