Në një libër të tij të ri, gazetari amerikan Bob Woodward, ka zbuluar disa detaje rreth “kontakteve që ka pasur ish-presidenti amerikan, Donald Trump, me presidentin rus, Vladimir Putin”.
Sipas The Guardian, duke cituar një shkrim të CNN, libri i ardhshëm i Bob Woodward “Lufta” zbulon gjithashtu se Donald Trump mbajti kontakte me Vladimir Putin pas përfundimit të presidencës së tij.
Duke cituar një ndihmës të ish-presidentit, Woodward shkruan se ka pasur “ndoshta deri në shtatë” telefonata mes të dyve që kur Trump u largua nga Shtëpia e Bardhë, përcjell Telegrafi.
Woodward zbulon gjithashtu detaje të një momenti nga kulmi i pandemisë Covid-19, kur Trump i dërgoi fshehurazi Putinit makineritë e testimit.
“Por Putin – i cili u izolua në mënyrë famëkeqe për shkak të frikës nga Covid – i tha Trumpit në një telefonatë që të mbante ‘sekret’ dorëzimin e makinerive Abbott”, raporton Woodward.
“Ju lutem, mos i tregoni askujt që më keni dërguar këto”, i tha Putin Trump, sipas Woodward.
“Nuk më intereson”, u përgjigj Trump. “Në rregull”.
“Jo, jo”, tha Putin. “Nuk dua t’i tregosh askujt sepse njerëzit do të zemërohen me ty, jo me mua. Ata nuk shqetësohen për mua”.
Madje, Woodward shkruan se Trump ka qëndruar në kontakt me Putinin pas largimit nga detyra.
Në një skenë, Woodward rrëfen një moment në Mar-a-Lago ku Trump i thotë një ndihmësi të lartë të largohet nga dhoma në mënyrë që “ai të mund të kishte atë që ai tha se ishte një telefonatë private me presidentin rus Vladimir Putin”. /Telegrafi/