Trepça ’89 është kualifikuar në çerekfinale të Kupës së Kosovës në futboll, ndonëse në fushë u mposht nga Feronikeli 74.
Klubi mitrovicas kishte paraqitur ankesë duke pretenduar se Feronikeli 74 ka aktivizuar lojtarë që nuk janë regjistruar sipas rregullores për regjistrimin, statusin dhe transferimin e lojtarëve.
Feronikeli 74 kishte fituar 1-0 ndeshjen e një të tetës së finales së Kupës së Kosovës, të luajtur më 4 shkurt në Drenas.
Ai rezultat fillimisht nuk ishte regjistruar nga Komisioni i Garave, ndërsa të martën ky Komision e ka regjistruar me rezultat zyrtar, 3-0, në të mirë të ekipit mitrovicas.
“Miratohet si e bazuar ankesa e Trepçës ’89 dhe ndeshja e 1/8 së finales së Kupës së Kosovës Feronikeli 74 – Trepça ‘89 regjistrohet me rezultat zyrtar 3:0 në favor të Trepçës ’89”, shkruan në vendim.
Komisioni i Garave ka konfirmuar se për klubin nga Drenasi në atë ndeshje kanë luajtur pa të drejtë Armend Blakqori, Donat Hasani, Fitim Susuri, Adem Maliqi, Endrit Baholli dhe Shpresim Zogu.
Sipas Komisionit, deri më 4 shkurt nuk kishte njoftim për regjistrimin e këtyre lojtarëve përmes platformës FIFA Connect.
Feronikeli ’74 luan në Ligën e Parë të Kosovës. Është klub i ri në fakt, që shfrytëzon të gjitha asetet e klubit nga Drenasi, Feronikeli, zyrtarisht i shuar. Feronikeli ’74 ka startuar me gara në Ligën e Parë, falë një fuzionimi që vazhdon të mbetet shumë i dyshimtë. Klubi i sapoformuar ishte fuzionuar me klubin Fortuna të Ligës së Dytë dhe me një vendim të pasqaruar ndonjëherë nisi garat në Ligën e Parë.
Feronikeli 74 është lider në Grupin A të Ligës së Parë dhe në rrugë të mirë për kalim në Superligë.
Trepça ’89 garon në Superligë dhe është në garë për mbetje në elitë.