Kryetari i Kuvendit anulon mbledhjen e Komisionit të përhershëm anketues në Kuvend.
Në rend dite ishin vendosur pikat për Spitalin Modular të Tetovës, tragjedinë në Bullgari dhe një parashtresë nga një qytetar i punësuar në Ministrinë e Mbrojtjes.
Sipas kreut të komisionit, Halil Snopçe anulimi i mbledhjes së trupit anketues përbën shkelje për të cilën do të pasojë përgjegjësi.
“Vlerësoj se po ndodhë për herë të parë në historinë tonë parlamentare që kryetari i Parlamentit të anulon mbledhjen e një trupi punues të konvokuar nga kryetari i trupit. Si mund të anulohet mbledhje e cila jo vetëm juridikisht, por edhe faktikisht nuk është e mbajtur? Ku po e gjeni bazën juridike për këtë? Ju z. Xhaferi a mendoni se jeni Gjykatë Kushtetuese dhe si pasojë keni të drejtë të anuloni akte dhe veprime të ndërmarra apo kanë për qëllim të ndërmerren duke u munduar ta ktheni situatën pas?”, tha Halil Snopçe, Kryetar i Komisionit anketues në Kuvend.
Në arsyetimin e tij, kryetari i Kuvendit, thotë se parashtresa e qytetarit Muhaedin Bela drejtuar kreut të komisionit bie ndesh me Rregulloren dhe Kushtetutën.
“Neni 185 i Rregullores së Kuvendit përcakton se Kuvendi mund të shqyrtojë ndër tjerash informata të dorëzuara nga propozues të autorizuar. Kjo do të thotë se të njëjtat duhet të parashtrohen te kryetari i Kuvendit, ndërsa kryetari i dorëzon te deputetët me ç’rast të njëjtat mund të shqyrtohen në mbledhjen e trupave punues kompetent të Kuvendit”, përgjigja ndaj kryetarit të Komisionit të përhershëm anketues.
Mbledhja ishte caktuar për më 25 mars, ndërsa më pas ishte kërkuar të shtyhet dhe të mbahet më 5 prill. Përgjigja e kreut të Kuvendit për anulimin e saj është pranuar më 1 prill./Alsat/