Gjykata Supreme ka pranuar ankesën e kandidatit të PDK-së për kryetar të Hanit të Elezit, Mehmet Ballazhi, dhe ka hedhur poshtë vendimin e PZAP-së për rivotim në këtë komunë.
Kështu ka njoftuar Gjykata Supreme përmes një njoftimi për media.
“Kolegjet e Gjykatës Supreme, kanë vendosur lidhur me tri ankesat e pranuara ndaj vendimeve të Panelit për Ankesa dhe Parashtresa (PZAP), që kanë të bëjnë me parregullsitë në procesin zgjedhor për zgjedhjet lokale të mbajtura me 17 tetor 2021.
Kolegji i Gjykatës Supreme e ka aprovuar si të bazuar ankesën e kandidatit për kryetar të komunës së Hanit të Elezit, Mehmet Ballazhi, nga Partia Demokratike e Kosovës (PDK), dhe ka anuluar vendimin e PZAP-së, duke e kthyer çështjen në rivendosje”, thuhet në njoftim.
Ndryshe, Paneli Zgjedhor për Ankesa dhe Parashtresa kishte anuluar votat për kryetar të Komunës së Hanit të Elezit.
Sipas PZAP-së, zgjedhjet janë anuluar për shkak të minimit të integritetit të zgjedhjeve si rezultat i presionit dhe organizimit me qëllim të përfitimit dhe mbështetjes së votuesve.
Kandidati i PDK-së, sipas rezultateve të KQZ-së, për zgjedhjet e 17 tetorit ka marrë me 50.98% të votave.
Rezultatet nga 100% të vendvotimeve të procesuara janë këto:
Mehmet Ballazhi (PDK) – 2.485 vota apo 50,98%
Rufki Suma – 2.070 vota apo 42,47%
Sherif Berisha (LVV) – 319 vota apo 6,54% /Telegrafi/
