Sekretari i Përgjithshëm i NATO-s, Jens Stoltenberg ka pritur sot në shtabin e NATO-s, kryeministrin slloven Robert Golob.
Pas takimit në një konferencë për media, Stoltenberg tha se diskutuan për situatën në Ballkanin Perëndimor, të cilin e quajti rajon me rëndësi strategjike në fqinjësinë tonë të përbashkët evropiane dhe me rëndësi strategjike për NATO-n.
“Shpërthimet e dhunës së vitit të kaluar në Kosovë ishin të papranueshme, dhe NATO u përgjigj me shpejtësi, duke vendosur 1000 trupa shtesë. Ne jemi të përkushtuar të sigurojmë që KFOR-i të vazhdojë të përmbushë mandatin e tij të OKB-së”, tha Stoltenberg.
Ai më tej shtoi se në këtë kohë kritike, ne të gjithë duhet të investojmë më shumë në sigurinë tonë.
“Kështu që unë i mirëpres hapat që ka ndërmarrë Sllovenia për të rritur shpenzimet e mbrojtjes”, u shpreh Stoltenberg.
I pyetur sesi do të sigurohet stabiliteti në Ballkanin Perëndimor, si në Kosovë ashtu edhe në Bosnje e Hercegovicë, shefi i NATO-s u shpreh se Sllovenia për shumë vite ka kontribuar me trupat, forcat e saj në misionin tonë paqeruajtës në Kosovë dhe mirëpres njoftimin e kryeministrit Golob për të qenë gati për të rritur më tej kontributet sllovene në misionin tonë të KFOR-it. Këta janë shembuj të rëndësishëm se si Sllovenia në fakt po bën një ndryshim”. /Telegrafi/
