Shoqata e Mullistëve të Kosovës ka reaguar në lidhje me cilësinë e miellit në Kosovë. Përmes një komunikate për media, kjo shoqatë ka sqaruar se fabrikat për përpunimin e grurit në Kosovë posedojnë teknologjinë më të avancuar në rajon dhe se këto fabrika kanë kapacitetet më të larta prodhuese.
Sipas shoqatës, cilësia e miellit apo edhe produktet e ndryshme të miellit të cilat prodhohen në Kosovë, i plotësojnë të gjitha standardet.
“Cilësia e miellit, apo më mirë të themi produktet e ndryshme të miellit të prodhuara në Kosovë, i plotësojnë të gjitha standarde të nevojshme dhe janë produkte me siguri të lartë ushqimore. Këtu duhet shtuar se nga mbjellja e farës nga fermerët e deri te korja e tyre, ato monitorohen në mënyrë konstante nga institucionet kompetente vendore. Gjithashtu, fabrikat për përpunimin e grurit në Kosovë posedojnë teknologjinë më të avancuara në rajon dhe kanë kapacitetet më të larta prodhuese të cilët operojnë në bazë të ISO dhe HACCAP standardeve, si dhe me laboratorë të akredituar në bazë të standardeve ndërkombëtare”, thuhet në komunikatën e Shoqatës së Mullisëve të Kosovës.
Sipas Shoqatës, edhe barrierat të cilat kanë qenë me shtetin shqiptarë kanë qenë të panevojshme, por që me angazhimin e institucioneve të Shqipërisë dhe të Kosovës është mundësuar që kjo barrierë të largohet.
“Angazhimi i tyre në formimin e grupeve të përbashkëta punuese për harmonizimin e standardeve të prodhimeve bujqësore do të krijojë mundësi te reja për sipërmarrësit dhe fermerët e dy vendeve tona. Hapa të ngjashëm duhet të merren edhe në sektorët e tjerë të ekonomisë, deri në arritjen e qëllimit tonë të përbashkët – unifikimi i dy tregjeve tona në një të vetëm”, thuhet në komunikatë.
Sipas kësaj shoqate, kanë qenë disa media të caktuara të cilat përmes shkrimeve të tyre janë munduar që ta shkatërrojnë bujqësinë dhe industrinë e miellit në vendin tonë, pa pasur ndonjë fakt.
“Shoqata jonë është tejet e shqetësuar me disa shkrime spekulative të mediave të caktuara, të cilat për interesa të ndryshme dhe pa fakte dhe argumente dëshirojnë të shkatërrojnë bujqësinë dhe industrinë e miellit në Kosovë, të cilët me djersën dhe mundin e tyre kontribuojnë në zhvillimin e ekonomisë kosovare. I bëjmë thirrje këtyre mediave të caktuara që nëse kanë fakte të tilla të pretenduara, t’i prezantojnë ato tek institucionet kompetente të Republikës së Kosovës, dhe t’i ndalojnë shkrimet e tilla spekulative që inkriminojnë të gjithë bujqit dhe prodhuesit e miellit në Kosovë. Shkrime të tilla të pabazuara mund të lënë pasoja psikologjike të pariparueshme tek konsumuesit e miellit kosovar”, thuhet në komunikatë.