Deputetët e OBRM-PDUKM, në pjesën e dytë të diskutimeve të sotme, si pjesë e gjashtë e seancës për shkarkimin e Prokurorit publik Marko Zvërlevski thanë se me pikën për shkarkimin e Prokurorit publik, LSDM harxhon kohë për një temë e cila epilog ligjor mund të ketë vetëm në nëntor, në vend se të diskutojnë për tema më të dobishme siç janë zjarret, deponia e Strugës ose Ligji për gjuhët, përcjell Telegrafi Maqedoni.
Liljana Zaturovska, nga OBRM, përsëriti se Zvërlevski mund të shkarkohet në nëntor, pasi që në Ligjin për zgjedhjet qartë thuhet se nga shpallja deri në mbajtjen e zgjedhjeve nuk ka mundësi ligjore për emërim të Prokurorit të ri në vend, dhe sipas tyre, i tërë plani i LSDM-së është ta vendosë sistemin e drejtësisë nën kontroll partiak.
Sipas Ilija Dimovskit, nga OBRM, seanca për Zvërlevskit është një PR-strategji e LSDM-së, që të flitet për çështje tjera, e jo për ato thelbësoret, siç janë strategjia kombëtare për refugjatët dhe ligji për gjuhët.
Nga ana tjetër, Tomisllav Tuntev, nga LSDM, thotë se neni 8 i Ligjit për zgjedhje të cilit i referohen deputët e OBRM-PDUKM-së, nuk ka të bëjë me Zvërlevskin sepse në këtë seancë nuk diskutohet për ndërprerje të marrëdhënies së punës ose punësim, por për përfundim të mandatit të funksionit Prokuror publik shtetëror./Telegrafi/