San Francisko e Shteteve të Bashkuara, e ka hapur seksionin e parë të kampit, ku po qëndrojnë 50 të pastrehë, nëpër tenda të vendosur në një distancë të caktuar.
Ky veprim është ndërmarrë, që të reduktohet numri i të pastrehëve që qëndrojnë nëpër trotuare, pasi është rritur në masë të madhe numri i tyre, transmeton Telegrafi.
Si pasojë e pandemisë me coronavirus, shumë njerëz kanë mbetur pa punë dhe shkaku i mungesës së të ardhurave, kanë mbetur pa një hapësirë për banim. “Fshati për gjumë të sigurt”, është quajtur ky kamp i mbyllur, që është vendosur në një bulevard ne qendër të qytetit.
Megjithëse deri më tani, ky qytet i Kalifornisë ka pasur probleme të mëdha me të pastrehë dhe e kishte të pamundur t’i strehonte, tani San Francisko po përdorë ambientet e boshatisura si pasojë e pandemisë, në mënyrë që së paku t’i izolojë në një hapësirë.
Situata me pandemi, ka bërë që të shtohet numri i tyre, ndërsa përbëjnë rrezik potencial për përhapjen e virusit, nëse qëndrojnë të shpërndarë nëpër rrugë. /Telegrafi/
