Roma kthehet tek fitoret, mposht Genoan në shtëpi

Roma ka shënuar fitore me rezultat 3-1 në shtëpi ndaj Genoas në kuadër të javës së 21-të në elitën e futbollit italian. 

Vendasit rrezikuan qysh në minutën e nëntë kur Paulo Dybala ishte i pafat pasi nga gjuajtja e lirë e goditi traversën. 

Roma kaloi në epërsi në minutën e 25-të me anë të Artem Dobvyk i cili shënoi për 1-0 pas një topi të kthyer brenda zonës. 

Mysafirët reaguan shpejtë duke barazuar shifat në minutën e 33-të përmes Patrizio Masinit i cili shënoi një gol të bukur për 1-1. 

‘Giallorossët’ rikthyen epërsinë kur në minutën e 60-të Dybala asistoi Stephan El Shaarawy me këtë të fundit që realizoi një super gol për 2-1. 

Goditjen përfundimtare Genoa e mori në minutën e 73-të kur portieri i tyre Nicola Leali realizoi autogol. 

Deri në përfundim të ndeshjes nuk pati më ndryshim të rezultatit dhe Roma u rikthye tek fitoret pas barazimit 2-2 ndaj Bolognas në udhëtim. 

Pas xhiros së 21-të, Roma ngjitet në pozitën e nëntë me 27 pikë të grumbulluara, teksa javën tjetër do të luajë në udhëtim ndaj Udineses./Telegrafi/