Zëdhënësja e Partisë Socialdemokrate, Natyra Kuçi, ka reaguar pas protestës së sotme për shtrenjtimin e energjisë elektrike, duke e akuzuar Policinë e Kosovës si të dhunshme dhe jo profesionale.
Reagimi i PSD-së vjen pasi Policia e Kosovës ka raportuar se në përplasjen e sotme me protestuesit para dyerve të Qeverisë janë lënduar tre zyrtarë policorë.
Kuçi në një postim në Facebook ka shkruat se shkallët e ndërtesës së Qeverisë nuk kanë pse të mbrohen.
“Hapësira i takon qytetarit. Objektet janë të burokratëve të bllokuar, hapësira është e qytetarëve të lirë”, ka thënë ajo.
Postimi i plotë i zëdhënëses së PSD:
“Polici e dhunshme dhe joprofesionale. Qeveri qe nuk perfaqeson. Shkallet e nderteses se Qeverise nuk ka pse te mbrohen. Hapesira i takon qytetarit. Objektet jane te burokrateve te bllokuar, hapesira eshte e qytetareve te lire. Ajo duhet te jete e lire, ne secilen proteste pavaresisht kush e organizon. Taktikat selektive perbejne diskriminim.
Nuk ka kush qe e frenon fuqine e drejtesise se njerezve te angazhuar!” (sic.), ka shkruar Kuçi.
Gjatë protestës së sotme për shtrenjtimin e rrymës përpara Qeverisë së Kosovës, kryetari i PSD-së, Dardan Molliqaj e ka goditur me shuplakë në fytyrë një pjesëtar të Policisë së Kosovës.
Policia e Kosovës përmes një komunikate ka njoftuar se tre zyrtarë policorë kanë pësuar lëndime trupore gjatë protestës që e organizoi Partia Socialdemokrate sot në Prishtinë kundër shtrenjtimit të energjisë elektrike.
Policia tutje shton se “disa nga pjesëmarrësit kanë shpërfillur urdhërat e zyrtarëve policor, të cilët përtej hudhjes së gjësendeve të ndryshme, me veprimet dhe sjelljet e tyre u kanë shkakuar lëndime të lehta tre zyrtarëve policor që ishin në kryerje të detyrës zyrtare”.
Ndryshe, në përpjekje për të mbajtur fjalim në shkallët para dyerve të objektit të Qeverisë, kryetari i PSD-së, Dardan Molliqaj, sot është filmuar duke qëlluar me shuplakë një zyrtar policor.
PSD sot ka organizuar në Prishtinë protestë kundër shtrenjtimit të energjisë elektrike.
Me mbishkrimet, ”Ju e rrisni çmimin, ne rezistencën”, “Krejt rrogat në rrymë”, “Krejt dhe shtrenjtë”, “Lypëm dritë, gjetëm terr” dhe thirrjet “Populli i bashkuar ka për të fituar”, qytetarët kanë shprehur pakënaqësitë e tyre ndaj propozimit të Zyrës së Rregullatorit të Energjisë (ZRRE) për tarifat e reja të energjisë.
Protestuesit janë nisur nga sheshi Zahir Pajaziti dhe janë grumbulluar para objektit të Qeverisë së Kosovës.
Kryetari i PSD-së, Dardan Molliqaj, ka thënë se propozimi i ZRRE-së duhet të kthehet mbrapa, pasi në të kundërtën do të ketë protesta çdo ditë.
Në protestë kanë marrë pjesë rreth 3 mijë protestues.
Pas protestës së sotme ka reaguar zëdhënësi i Qeverisë së Kosovës, Përparim Kryeziu, i cili ka thënë se kishte përpjekje për ta eskaluar protestën. /Telegrafi/
