Sulmuesi i Napolit, Victor Osimhen thuhet se po shqyrton një ofertë të re nga skuadra e Arabisë Saudite, Al-Ahli, pavarësisht përparimeve të fundit nga ekipi i Ligës Premier, Chelsea.
Sipas raportimeve nga Sky Sport Italia, Al-Ahli i ka paraqitur një ofertë të dytë qendërsulmuesit nigerian. Gianluca Di Marzio raporton se skuadra e Ligës Pro Saudite është e gatshme t’i ofrojë lojtarit një kontratë katërvjeçare me vlerë 30 milionë euro në sezon.
Raportimet gjatë fundjavës sugjeruan se Al-Ahli ishte i përgatitur t’i ofronte Napolit 70 milionë euro për të nënshkruar Osimhen, pothuajse gjysma e klauzolës së lirimit prej 130 milionëve në kontratën e tij.
Lojtari dhe agjenti i tij tani po vlerësojnë ofertën dhe po shqyrtojnë hapat e tyre më të mirë. Napoli mbetet i bindur se do të mbyllë një shitje para fundit të afatit kalimtar më vonë këtë javë.
Oferta nga Arabia Saudite vjen pas interesimit të ri nga Chelsea, ndërsa dy klubet janë në garë me kohën për ta mbyllur sa më shpejtë transferimin.
Napoli, pronta una nuova offerta dell'Al-Ahli per Osimhen#SkySport #Napoli #Osimhen #AlAlhi #SkyCalciomercato https://t.co/ucu1yyVu4E
— skysport (@SkySport) August 28, 2024
Raportimet të martën mbrëma pohuan se skuadra e Ligës Premier ishte e përgatitur t’i ofronte Osimhenit kushte të ngjashme me ato që ai fiton në kontratën e tij aktuale me Napolin. Kjo do të ishte rreth 10 milionë euro në sezon.
Chelsea gjithashtu kuptohet se është i gatshëm të paguajë rreth të njëjtin çmim që ofroi Al-Ahli, rreth 70 milionë euro. /Telegrafi/