Ministri i Financave, Hekuran Murati, ka thënë se gjatë mandatit të tij si ministër ka dyfishuar numrin e të rinjve të punësuar.
Murati përmes një postimi në rrjetin social në Facebook ka shkruar se për 30 muaj, janë mbi 32 mijë të reja e të rinj që kanë filluar punën.
Ai po ashtu theksoi se asnjëherë më parë nuk ka pasur kaq shumë masa e mbështetje për punësimin e të rinjve sikurse me Qeverinë aktuale.
“Gjithsej të rinj të punësuar të moshës 15-24 në fillim të vitit 2021 ishin 28,293 persona. Kurse në fund të korrikut 2023, numri i tyre është mëse dyfishuar në 60,884 persona. Pra për 30 muaj, janë mbi 32 mijë të reja e të rinj që kanë filluar punën.
Diçka e tillë nuk ka ndodhur asnjëherë në historinë e shtetit tonë.
Sepse asnjëherë më parë nuk ka pasur kaq shumë masa e mbështetje për punësimin e të rinjve sikurse me Qeverinë tonë”, ka shkruar Murati në Facebook. /Telegrafi/
