Njoftoi për hapjen e akademisë së futbollit, por sa shumë paska ndryshuar Ozil

Ish-ylli i Gjermanisë, Mesut Ozil, ka zbuluar një kapitull të ri në jetën e tij pas futbollit: hapjen e një akademie moderne futbolli në Umraniye të Stambollit. Synimi i projektit është zhvillimi i talenteve të rinj turq dhe krijimi i një rrjeti të qëndrueshëm drejt elitës së futbollit evropian.

Akademia, që pritet të hapet në fillim të vitit 2027, do të jetë për të rinjtë nga 11 deri në 19 vjeç dhe do të funksionojë në bashkëpunim me klubin Umraniyespor. Ozil theksoi mungesën e infrastrukturës cilësore në Turqi, ndonëse vendi ka pasion të madh për futbollin.

Mbështetur nga konglomerati DBE Holding, akademia do të ndjekë modelin evropian të zhvillimit, të frymëzuar nga përvoja e Ozil në klubet si Schalke, Real Madrid dhe Arsenal. Ajo do të ofrojë stërvitje, edukim taktik, ndihmë psikologjike dhe zhvillim personal.

Partneriteti me Umraniyespor shihet si strategjik, me klubin që ka një histori solide dhe potencial për të qenë qendër zhvillimi për talentet e së ardhmes. Ndërtimi i objektit do të nisë në vitin 2026, pas marrjes së lejeve dhe tokës.

Në një kohë kur futbolli turk po tërheq emra të mëdhenj nga jashtë, Özil theksoi nevojën për investime në zhvillimin vendas nëse Turqia dëshiron të konkurrojë në planin afatgjatë.

Arritja e ekipit kombëtar në çerekfinale të Euro 2024 ka rritur shpresat për një të ardhme më të ndritur. Ozil beson se akademia e tij mund të bëhet hallka që mungon në sistemin e futbollit turk.

Megjithatë, sfidat janë të mëdha – që nga konkurrenca me akademitë ekzistuese e deri te përshtatja kulturore e modelit të ri. Por Ozil është i vendosur: “Me vlera të forta dhe një vizion të qartë, ne mund të ndryshojmë lojën". /Telegrafi/