Një person ka vdekur sot në mesditë në një aksident trafiku që ka ndodhur në fshatin Çikatovë e vjetër të Drenasit.
Si pasojë e këtij aksidentit lëndime trupore kanë pësuar edhe tre persona tjerë.
Lajmin e ka konfirmuar zëdhënësi i policisë për rajonin e Prishtinës, Agron Borovci.
“Rreth orës 12:30, kemi pranuar informatën se në fshatin Çikatovë e vjetër – Drenas, ka ndodhur një aksident trafiku me pasoja fatale. Si pasojë e aksidentit lëndime trupore kanë pësuar katër persona, një prej tyre nuk ka arritur të përballojë plagët dhe ka ndërruar jetë. Vdekjen e tij e ka konstatuar ekipi mjekësor në QMF (Qendrën e Mjekësisë Familjare) në Drenas”, ka thënë ai.
Borovci ka njoftuar se në këtë aksident ka qenë i përfshirë një automjet, ngasësi i të cilit për shkaqe të panjohura deri më tash e ka humbur kontrollin mbi automjetin dhe është aksidentuar.
Ai tutje ka bërë të ditur se me rastin po merret hetuesia nga njësiti i trafikut rrugor./Telegrafi/