Makerspace Innovation Center Prizren ka realizuar ngjarjen e radhës me ekspertin ndërkombëtar, Mati Barbero. Në këtë takim është shqyrtuar profili i klientit ideal për bizneset apo startup-et, me qëllim të cytjes së ndërmarrësve vendorë për të aplikuar strategji të reja të qasjes ndaj tregut.
“Në ITP Coworking Space është mbajtur një takim shumë frymëzues, me mbi 40 pjesëmarrës, pronarë biznesesh dhe themelues startup-esh, ku është trajtuar tema “Profili i Klientit Ideal”, me të ftuarin special, Mati Barbero”, thuhet në njoftimin e Makerspace Innovation Center Prizren, raporton Telegrafi.
Mati Barbero sipas përshkrimit të ofruar është mentor i startup-eve dhe investitor, i cili ka ndihmuar mbi 300 biznese të përshpejtojnë suksesin e tyre. Gjithashtu është bashkëthemelues i produktit SaaS, Shcoolin 1 me mbi 700 mijë përdorues.
Në këtë ngjarje, sipas njoftimit, Barbero ka pasur diskutim ndërveprues me pjesëmarrësit, të cilët kanë ndarë sfidat dhe përvojat e tyre mbi identifikimin dhe targetimin e klientëve të duhur për bizneset e tyre, raporton Telegrafi.
Ky aktivitet është realizuar nga Makerspace Innovation Center Prizren në saje të bashkëpunimit me Programin Zviceran për Ndërmarrësi në Kosovë (Swiss EP Kosovo), që angazhohet me akterët lokalë të ekosistemit sipërmarrës në ndërtimin e kapaciteteve për të mbështetur zgjerimin e startup-eve. /Telegrafi/