Ministri izraelit: Presidenti i Sirisë al-Sharaa duhet të eliminohet menjëherë
Ministri izraelit i Çështjeve të Diasporës, Amichai Chikli, bën thirrje drejtpërdrejt që presidenti sirian Ahmed al-Sharaa të "eliminohet pa vonesë", në postimet në anglisht dhe hebraisht në llogarinë e tij X.
Pas njoftimit të Izraelit këtë mëngjes se do të godasë objektivat e regjimit sirian në përgjigje të sulmeve të raportuara kundër popullsisë druze nga forcat e Sharaa-s, Chikli shkruan: "Kushdo që mendon se Ahmad al-Sharaa është një udhëheqës legjitim gabon rëndë - ai është një terrorist, një vrasës barbar që duhet të eliminohet pa vonesë", transmeton Telegrafi
Duke ndarë pamjet që qarkullojnë në internet që duket se tregojnë forcat e ushtrisë siriane duke u tallur dhe sulmuar anëtarë të komunitetit druze duke ua rruar me forcë qimet e fytyrës, Chikli shton në hebraisht: "Nëse duket si Hamas, flet si Hamas dhe vepron si Hamas - është Hamas", duke krahasuar sjelljen e supozuar të trupave siriane me atë të grupit terrorist me bazë në Gaza.
"Nuk duhet të qëndrojmë duarkryq përballë regjimit terrorist islamisto-nazist të Al-Kaedës me kostum dhe kravatë", vazhdoi ministri izraelit.
“Pamë masakrën e tmerrshme të alavitëve, hasëm në heshtje shurdhuese nga udhëheqësit evropianë, dhe tani po dëshmojmë masakrën dhe poshtërimin e druzëve. Regjimi terrorist në Siri duhet të luftohet”, shtoi ai.
Që kur Sharaa mori pushtetin në Siri në fund të vitit të kaluar, zyrtarët izraelitë - përfshirë kryeministrin Benjamin Netanyahu dhe ministrin e Jashtëm Gideon Sa’ar - fillimisht mbajtën një qëndrim të ashpër kundër regjimit të ri, duke përmendur lidhjet e kaluara të Sharaa-s me Al-Kaedën dhe përplasjet midis forcave qeveritare me druzët, alavitët dhe grupet e tjera minoritare.
Ndërsa retorika kundër regjimit të ri u qetësua pas vendimit të presidentit të SHBA-së Donald Trump për të hequr sanksionet ndaj Sirisë në maj, dhe thuhet se po bëhen përpjekje midis Izraelit dhe Sirisë për të arritur një marrëveshje sigurie ose edhe paqeje, luftimet në ditët e fundit midis forcave qeveritare siriane dhe milicive druze e shtynë Izraelin të kryejë sulme të intensifikuara në Siri, të cilat thotë se synojnë të mbrojnë druzët dhe të parandalojnë çdo kërcënim për Izraelin. /Telegrafi/