Në Berlin u mbajt një konferencë për të shënuar dhjetëvjetorin e Procesit të Berlinit, ku u mblodhën ministra të ekonomisë, liderë të biznesit dhe ekspertë ndërkombëtarë.
Takimi, i organizuar nga Ministri Federal i Çështjeve Ekonomike dhe Veprimit Klimatik i Gjermanisë, Dr. Robert Habeck, u përqendrua në vlerësimin e progresit drejt krijimit të Tregut të Përbashkët Rajonal (CRM) dhe vendosjen e agjendës së ardhshme për integrimin e mëtejshëm ekonomik të rajonit.
Danijela Gacevic, Drejtoresha në Detyrë e Sekretariatit të CEFTA-s, theksoi rëndësinë e miratimit të dhjetë marrëveshjeve të reja të lehtësimit të tregtisë që janë në pritje të aprovimit.
“Miratimi i këtyre marrëveshjeve do të jetë një hap i rëndësishëm drejt një Tregu të Përbashkët Rajonal në përputhje me BE-në. Secila prej tyre është një paketë përfitimesh për bizneset dhe konsumatorët që do të na afrojë, jo vetëm me njëri-tjetrin, por edhe me BE-në. Prandaj, është thelbësore që t’i miratojmë sa më shpejt,” tha Gacevic.
Marrëveshjet e reja të CEFTA-s përfshijnë fusha si tregtia elektronike, shërbimet e shpërndarjes së pakove, parandalimi i bllokimit të pajustifikuar gjeografik, kualifikimet profesionale, pronësia intelektuale dhe menaxhimi i rrezikut. Ato pritet të miratohen nga Komiteti i Përbashkët i CEFTA-s në formën e Vendimeve, Protokolleve Shtesë ose Rekomandimeve.
Konferenca nënvizoi gjithashtu rëndësinë në rritje të Ballkanit Perëndimor në peizazhin ekonomik europian dhe potencialin e tij për t’u integruar më tej në Tregun e Vetëm të BE-së.
“Përparimi në CRM i hap rajonit derën drejt Tregut të Vetëm të BE-së, duke shfrytëzuar mundësitë e ofruara nga Plani i Rritjes i BE-së,” u theksua gjatë diskutimeve.
Para konferencës, Forumi i Biznesit mblodhi së bashku kompani gjermane dhe ato nga Ballkani Perëndimor në një aktivitet B2B, që synonte nxitjen e zinxhirëve të përbashkët të furnizimit dhe promovimin e mundësive të investimit në rajon. /Telegrafi/