Profesori Aurel Plasari ka publikuar një libër të ri mbi Arbnin historik, gjeografik, kishtar dhe politik. Studimi i tij hedh dritë mbi pauzën historike të nëntë shekujve të errët për historinë e trevës shqiptare.
“Mesjeta ka qenë një kohë që kemi qenë të njëkohshëm të paktën me zonat italike. Shkatërrimi erdhi pas motit të madh, që ishte shekulli i luftërave dhe me pas me pushtimin nga Perandoria Osmane. Pavarësisht nga sa thonë osmanofilet, pati dëme”, thotë Plasari.
Ai përgjigjet edhe për debatin mbi shtatoren e Skënderbeut në Prizren.
“Ai është një debat që nuk është shqetësues. Ka edhe momente të tilla. Në fakt ne e kemi ngushtuar shumë këndin dhe artin e kuptojmë vetëm në tipare ngjashmërie. Kemi mbetur vetëm të realizmi socialist. I kemi gjithë shtatoret me burra në këmbë – Ahmet Zogu, Ismail Qemali, Lasgushi, Kuteli, janë të gjithë burra në këmbë. Nuk po them t’i ulim, por po them që duhet edhe të emancipohemi e t’i konceptojmë edhe ndryshe”.
Plasari dha edhe një përgjigje për debatin e ngritur mbi dosjet për Camajn e Koliqin. Sipas tij, ai i ka njohur të dy dhe ka bërë përpjekje që të dy t’i nxjerrë nga harresa, në vitet 1990.
“Kam shkruar për Ernest Koliqin dhe prozën e tij dhe për Martin Camajn. Për Camajn kam thënë që është shelbuesi i të tijve në një shkrim që kam bere për veprën e tij. Unë them që duhen hapur dosjet e shkrimtarëve por ama, të hapen për të parë dhe për të kuptuar veprën”, deklaron ndër të tjera Plasari. /News 24/
