Kuvendi i Kosovës ka miratuar edhe në lexim të dytë Projektligjin për ndarjet buxhetore për vitin 2023, ku përfshihet edhe koeficienti prej 105 euro.
Pas këtij miratimi, pagat në sektorin publik për muajin shkurt do të dalin bazuar në Ligjin e Pagave.
Ky Ligj u miratua me 63 vota për, asnjë kundër dhe asnjë abstenim. Pas kalimit të amendamenteve të këtij Ligji, në momentin kur po votohej deputetët e LDK-së lëshuan seancën, ndërkaq deputetët e PDK-së nuk morën fare pjesë në votim.
Gjatë debatit, opozita propozoi ngritje të vlerës së koeficientit deri në 132 euro, por nuk mori mbështetjen e shumicës.
Më 1 shkurt, Qeveria miratoi koeficientin në vlerë prej 105 eurosh.
Ligji i Pagave rregullon çështjen e pagave për mbi 82 mijë punëtorë të sektorit publik. Megjithatë, ka pasur pakënaqësi te disa sektorë. 18 ankesa janë deponuar tek Avokati i Popullit që të ankohet në Gjykatën Kushtetuese.
Me Ligjin e ri për pagat, niveli i koeficienteve është nga 2 deri në 18. Presidentes së shtetit i është caktuar koeficienti më i lartë, sipas të cilit ajo do të ketë pagën më të madhe. /Telegrafi/