Kryeministri i Kosovës, Albin Kurti, ka shprehur shqetësimin mbi sundimin e ligjit në Serbi.
Në rrjetin social “X”, Kurti ka bashkëngjitur një letër që kryetari i Partisë së Socialistëve Evropianë (PES), Stefan Lofven, i ka dërguar kryeministres së Serbisë, Ana Brnabiq, ku flitet për parregullsitë në zgjedhjet e 17 dhjetorit 2023 në Serbi.
Kreu i ekzekutivit kosovar ka theksuar se zgjedhjet e lira dhe të ndershme janë gurthemel i stabilitetit dhe progresit.
“I përsëris shqetësimet e ngritura nga presidenti i PES, Stefan Lofven në lidhje me sundimin e ligjit në Serbi. Zgjedhjet e lira dhe të ndershme, si gurthemel i stabilitetit dhe progresit, duhet të mbrohen kolektivisht. Këto shtylla të demokracisë janë vendimtare për aspiratat tona të përbashkëta si socialdemokratë”, shkruan Kurti.
Në letrën që Lofven i ka dërguar Brnabiqit më 9 janar 2024, shprehet shqetësimi mbi parregullsitë e konstatuara nga vëzhguesit ndërkombëtarë për zgjedhjet e 17 dhjetorit 2023 në Serbi.
“Si një parti politike evropiane që ndan dhe mbron vlerat themelore të Bashkimit Evropian si demokracia, sundimi i ligjit, të drejtat civile dhe mundësitë e barabarta për të gjitha partitë politike legjitime për të marrë pjesë në zgjedhje, ne duhet të reagojmë për parregullsitë e konstatuara nga Misioni Vëzhgues Ndërkombëtar i Zgjedhjeve (IOEM) gjatë zgjedhjeve në Serbi”, thuhet në letër./Telegrafi/
I echo the concerns raised by PES President Stefan Löfven regarding the rule of law in Serbia. Free & fair elections, as the cornerstone of stability & progress, must be collectively defended. These pillars of democracy are crucial for our shared aspirations as Social Democrats. pic.twitter.com/BqudprLHVL
— Albin Kurti (@albinkurti) January 12, 2024