Kryeministri britanik, Keir Starmer ka deklaruar se Britania e Madhe qëndron me Izraelin duke theksuar se është “thellësisht i shqetësuar” se Lindja e Mesme “është në prag” të një tjetër lufte.
Në një fjalim televiziv nga Downing Street, kryeministri dënoi një sulm nga Irani që pa rreth 200 raketa të lëshuara drejt Izraelit.
Siç raportohet, në momentin e sulmit Starmer ishte duke zhvilluar një bisedë telefonike me kryeministrin izraelit, Benjamin Netanyahu.
Lideri britanik tha se raketat kishin për qëllim civilët dhe se është “shumë shpejt për të vlerësuar plotësisht ndikimin e tyre”, shkruan skynews, përcjell Telegrafi.
“Unë e dënoj plotësisht këtë përpjekje të regjimit iranian për të dëmtuar izraelitët e pafajshëm, për të përshkallëzuar këtë situatë tepër të rrezikshme dhe për ta shtyrë rajonin gjithnjë e më pranë një lufte gjithëpërfshirëse”, tha Starmer.
“Ne qëndrojmë me Izraelin dhe njohim të drejtën e tij për vetëmbrojtje përballë këtij agresioni”, shtoi ai.
Gjithashtu, Starmer i bëri thirrje Iranit që t’i “ndalojë këto sulme”, duke thënë se ai “kishte kërcënuar Lindjen e Mesme për një kohë të gjatë”.
Ndryshe, Izraeli është zotuar se “do të ketë pasoja” pas sulmit, për të cilin Irani tha se ishte në shenjë hakmarrje për vrasjen e liderit të Hezbollahut, Hassan Nasrallah në Bejrut javën e kaluar.
I pyetur nëse Britania e Madhe do të ishte e gatshme të përdorte aftësitë ushtarake britanike për të ndihmuar Izraelin të mbrohet kundër Iranit, kryeministri tha: “Kjo, siç do ta vlerësoni, është një situatë në zhvillim”.
“Por ajo që unë do të them është se ne qëndrojmë me Izraelin dhe të drejtën e tij për vetëmbrojtje. Dhe çdo përditësim përkatës do të sigurohet në kohën e duhur”. /Telegrafi/