Kosova ka ndërmarrë hapin e parë drejt anëtarësimit të plotë në International Bartenders Association (IBA), një zhvillim i rëndësishëm për komunitetin e bartenderëve në vend. Ky proces është konfirmuar nga ushtruesi i detyrës së kryetarit dhe një nga themeluesit e Kosovo Bartenders Association (KoBA), Valdrin Govori, përmes një komunikate zyrtare të shoqëruar me letrën e konfirmimit nga IBA.
Në letrën e dërguar nga Presidenti i International Bartenders Association, Bruno Santos, Kosova është përfshirë në statusin e “Observer” në IBA, një fazë paraprake që duhet të kalojë para se të bëhet anëtare e plotë brenda tre viteve të ardhshme. Në këtë letër, Santos ka ftuar delegacionin që përfaqëson KoBA-n në World Cocktail Championship dhe në Asamblenë e Përgjithshme të IBA-së. Ai gjithashtu ka shprehur mirënjohjen për Ministrinë e Punëve të Jashtme dhe Diasporës së Kosovës, si dhe për Ambasadën e Kosovës, për mbështetjen e dhënë në këtë proces.
Presidenti i IBA-së ka theksuar rëndësinë e lidershipit të Kosovo Bartenders Association dhe rolin e saj në ndjekjen e standardeve të vendosura nga IBA. Ai ka inkurajuar përkrahësit që të vazhdojnë mbështetjen e tyre për KoBA-n, duke ndihmuar kështu zhvillimin dhe profesionalizimin e bartenderëve në Kosovë.
Planet dhe Synimet e KoBA-së
Sipas komunikatës, kryetari i KoBA-së, Valdrin Govori, e ka cilësuar këtë sukses si një hap të madh për bartendingun në Kosovë, por gjithashtu ka theksuar se ky është vetëm fillimi i një procesi më të gjerë të integrimit. Ai ka bërë të ditur se KoBA tashmë ka filluar një fazë të re të ristrukturimit dhe zhvillimit të brendshëm, në mënyrë që të përgatitet për anëtarësimin e plotë në IBA.
Për më tepër, është njoftuar se presidenti i IBA-së pritet të vizitojë Kosovën në pranverën e vitit 2025, kohë kur do të mbahet edhe kampionati i parë i koktejeve në vend.
Në përfundim, KoBA ka deklaruar se do të fokusohet në katër fusha kryesore:
-Ofrojë mundësi zhvillimi për bartenderët e Kosovës përmes trajnimeve të harmonizuara me IBA.
-Krijojë platforma të ndryshme si gara dhe konkurse që do t’u mundësojnë bartenderëve kosovarë të shfaqin talentin e tyre në skenën ndërkombëtare.
-Zhvillojë strukturën dhe rregulloret në përputhje me standardet e IBA-së.
-Ndihmojë në vetëdijësimin e shoqërisë për rëndësinë e konsumit të përgjegjshëm të alkoolit, përmes programit shoqëror të shoqatës, #PiMePërgjegjësi.
Ky zhvillim shënon një moment historik për bartenderët në Kosovë dhe hap rrugën për përfshirjen e tyre në skenën globale të miksologjisë. /Telegrafi/