Të gjithë ju me gjasë e dini se Lionel Messi e ka fituar trofeun e parë me Argjentinën duke fituar medaljen e artë në Beijing në vitin 2008.
Por, a e keni ditur se kjo për pak sa nuk ndodhi? Presidenti i Barcelonës, Joan Laporta, ishte drejtuar në gjykatë për të parandaluar Messin që t’i bashkohej kombëtares.
Kjo pasi blaugranasit përfunduan në pozitën e tretë në La Liga dhe ata kishin nevojë që të siguronin vendin e tyre në Ligën e Kampionëve përmes kualifikimeve.
Laporta kërkoi që lojtarët e tij më të mirë të jenë në dispozicion për atë duel shumë të rëndësishëm ndaj ekipit polak Wisla Krakow.
“Ne nuk kemi dyshime se rregullat janë në anën tonë. Ne nuk e kemi obligim që ta lirojmë lojtarin”, kishte thënë Laporta.
Për këtë arsye ai ndërmori masa ligjore ndaj Federatës së Futbollit të Argjentinës, madje e fitoi atë rast.
Messi më vonë kishte pranuar se ai ishte i etur që t’i bashkohej bashkëlojtarëve të tij në Kinë, dhe pikërisht në atë moment ndërhyri Pep Guardiola, duke i dhënë leje atij që të shkojë në Lojërat Olimpike.
Vendimi i Guardiolës doli të ishte i duhuri. Barcelona avancoi në fazën e grupeve pasi e mposhti ekipin polak me rezultat të përgjithshëm 4-1, ndërkohë, Messi siguroi medaljen e artë me Argjentinën./Telegrafi/