Deputetët e Lidhjes Demokratike të Kosovës (LDK), Avdullah Hoti dhe Driton Selmanaj sot kanë takuar përfaqësuesin special të SHBA-së për Ballkanin Perëndimor Gabriel Escobar me të cilin kanë biseduar për sfidat që po kalon Kosova në procesin e dialogut me Serbinë.
Hoti përmes një postimi në rrjetin social në Facebook ka shkruar se bashkëpunimi shumë i ngushtë me SHBA-të, është rruga e vetme që garanton epilog të mirë të secilit proces për Kosovën.
“Sot, bashkë me kolegun deputet Driton Selmanaj, ishim të nderuar ta takonim përfaqësuesin special të SHBA-së për Ballkanin Perëndimor z. Gabriel Escobar.
Takimin e karakterizuan biseda të hapura dhe të sinqerta me theks të veçantë për sfidat që po kalon Republika e Kosovës në procesin e dialogut me Serbinë.
Bashkëpunimi shumë i ngushtë me SHBA-të, është rruga e vetme që garanton epilog të mirë të secilit proces për Kosovën.
Kosova dhe shqiptarët janë të bekuar me miqësinë që kemi me SHBA-të”, ka shkruar Hoti. /Telegrafi/
