Ish-sekretarja amerikane e shtetit, Hilary Clinton, përmes një video-mesazhi nga Amerika i është drejtuar Konferencës për Sigurinë që po mbahet në Prishtinë për 20-vjetorin e hyrjes së NATO-s. Përmes këtij mesazhi, Hilary Clinton ka deklaruar se qytetarët e Kosovës e meritojnë pavarësinë dhe paqen.
Në lidhje me rolin dhe të ardhmen e NATO-s, Clinton tha se viteve të fundit ka dëgjuar që e vënë në dyshim rolin, mision dhe ekzistencën e NATO-s në shekullin e XXI.
“Ne e dimë se Aleanca e NATO-s mbetet esenciale për mbrojtjen e lirive të cilat janë fituar. Dhe ne nuk duhet shikojmë tutje, por të ndalemi këtu në Kosovë, për të na përkujtuar vetveten për fuqinë e saj. Ju asnjëherë nuk duhet të nënvlerësoni këtë”, tha Clinton.
Ajo kujtoi kampet e refugjatëve që kishte parë në vitin 1999 dhe mikpritjen që gjeti ndër shqiptarët e zhvendosur nga Kosova.
“Nuk do ta harroj asnjherë vizitën në kampin e refugjatëve në Maqedoni. Atje gjeta mikpritjen dhe këto ngjarje u shënuan me përqafime. Kjo shënon afirmitetin e ndërsjelltë që kemi”.
“Sot në këtë përkujtim shohim përparimin, paqen dhe një të ardhme të ndritshme. Zgjedhjet të drejta dhe përforcim të drejtësisë”.
“Unë nuk isha në gjendje të isha me ju në shënimin e këtij përvjetori, mirëpo ju tregoj se ju jeni në mendimet e mia”, tha Clinton.
Clinton në këtë video falënderoi edhe ish-presidenten Atifete Jahjaga për aktivitetin e saj edhe në të drejtat e grave.
