Gjykata Themelore në Prishtinë njofton se lidhur me aktakuzën e ngritur kundër të pandehurve Agim Çeku, Nuredin Lushtaku, Sadik Halitjaha, Shkumbin Demaliaj, Qelë Gashi, Shukri Buja Ahmet Daku, Rrustem Berisha, Faik Fazliu, Smajl Elezaj, Fadil Shurdhaj dhe Xhavit Jashari, është vendosur që aktakuza në fjalë t’i kthehet në përmirësim dhe qartësim Prokurorisë Speciale të Republikës së Kosovës.
Këtë e ka bërë të ditur Gjykata Themelore në Prishtinë përmes një komunikate për media.
Më tutje aty theksohet se ky veprim nga Gjykata është bërë për shkak se e njëjta nuk është përpiluar konform nenit 241, paragrafi 1, pika 1.4 të KPP-së. Po ashtu janë dhënë dhe arsyeje lidhur me anulimin e seancës dëgjimore për shqyrtimin e masës së përkohshme për sigurimin e kërkesës pasurore juridike.
Arsyeja e kthimit të aktakuzës sipas kryetares së Trupit Gjykues bie për shkak se dispozitivi i aktakuzës në pjesën e përshkrimit faktik të veprës penale është konfuz dhe si i tillë nuk lejon mundësimin e procedimit të drejtë pa zvarritje e pengesa të shumta të këtij procesi. /Telegrafi/