Kamerat e sigurisë kapën momentin kur një Ford Mustang u përplas në një shtëpi në Kaliforni. Incidenti ndodhi të enjten rreth orës 19:00 sipas kohës lokale në Grand Terrace kur një Mustang i gjeneratës së pestë nuk arriti të ndalonte në një kryqëzim.
Pamjet e shfaqin Mustang-un duke iu afruar kryqëzimit T shumë shpejtë. Nuk është e qartë se nëse shoferi përdori frenimin, por vetura kishte momentum të tepërt. Mustang-u arriti fundin kur hyri në kryqëzim, me shkëndija që fluturonin teksa amortizatorët hyn në funksion, duke dërguar gomat e pasme në ajër.
Mustang-u, i cili duket të jetë një model V6 i viteve 2010-2012, u rrëzua përsëri në anën tjetër të rrugës në kohën e duhur për t’u përplasur në pengesë. Kjo e ngriti veturën në ajër, duke fluturuar në verandën e përparme të një shtëpie. Vetura u ngrit për pak momente në ajër përpara se të përplasej në tokë, shkruan Motor 1, përcjell Telegrafi.
Në varësi të vitit të Mustang, ai mund të ketë një motor V6 4.0 ose 3.7 litërsh. “Blue Oval” i dha gjeneratës së pestë Mustang një përditësim të konsiderueshëm të stilit për vitin e modelit 2010, por nuk do të instalonte sisteme të reja të fuqisë deri në vitin 2011 kur prodhuesi i veturave prezantoi gjithashtu Coyote V8 5.0 litërsh së bashku me motorin bazë më të vogël.
Banorët ndodheshin në shtëpi në momentin e ngjarjes, por askush brenda nuk u lëndua. Fatmirësisht edhe drejtuesi i mjetit është larguar duke dal nga vetura dhe duke refuzuar ndihmën mjekësore. Sipas KTLA-së, është e paqartë se çfarë e shkaktoi aksidentin.
Megjithatë, shoferi mori dy gjoba. Policia shkroi një për mos respektimin e një shenje ndalimi dhe një tjetër për drejtimin pa patentë. Vetura mund të kishte pësuar një dështim mekanik, por Ford gjithashtu dukej se po udhëtonte me shpejtësi tejet të lartë për një zonë banimi. /Telegrafi/