Edhe pse është rritur shuma e mjeteve financiare përmes të cilave Qeveria i përkrah fermerët në veprimtaritë bujqësore e blegtorale, ka disa femër që deri më tani asnjëherë nuk kanë përfituar nga kjo përkrahje. E pavarësisht se ata nuk janë mbështetur asnjëherë, po ia dalin që me forca të veta t’i zgjerojnë veprimtaritë e tyre në shumë sektor të bujqësisë.
Njëri ndër ta është edhe Sadat Tahiraj nga fshati Maznik i Komunës së Deçanit, i cili merret me veprimtari bujqësore tash e disa vite. Ai tregon se nga kjo veprimtari i siguron edhe të ardhurat për familjen e tij. Ky fermer, i cili kultivon më shumë se 50 hektarë me drithëra dhe po ashtu mban edhe disa krerë kafshë, thotë se është i kënaqur me punën që bënë, por që sipas tij fermerëve i duhet më shumë përkrahje në mënyrë që ata të shtojnë aktivitetin e tyre bujqësorë. “Këtë vit kam pesë hektarë me misër, pesë hektarë me thekër, 40 hektarë më grurë si dhe tre hektarë me tropikal. Të gjitha drithërat të cilat i kultivojë i përdorë si ushqim për kafshët që mbajë në stallën time”, tha Tahiraj. Edhe me blegtori, ai tregon se ka filluar të merret tash e disa vite, ku aktualisht ka 13 lopë qumështore si dhe mbi 30 viça për majmëri. “Ka leverdi edhe mbajtja e kafshëve për majmëri e po ashtu edhe mbajtja e lopëve qumështore pasi që po ka edhe treg për të dyja”, ka thënë Sadat Tahiraj fermer nga Mazniku i Deçanit.
Por, pavarësisht vështirësive ai tregon se nuk po hasë në përkrahje të institucioneve lokale, qendrore apo ndonjë organizatë që përkrahë zhvillimin e bujqësisë.
“Edhe fillimin e veprimtarisë bujqësor e kam pasur me forca të mija, po ashtu edhe jam duke e vazhduar pa më përkrahur askush. Kam plane me e rrit numrin e krerëve dhe të hektarëve por nuk kam mundësi vetëm nëse më përkrahë ndokush”, tha fermeri Sadat Tahiraj.
Ndryshe zyrtarët e Ministrisë së Bujqësisë, Pylltarisë dhe Zhvillimit rural (MBPZHR), kanë thënë se do të vazhdojnë me përkrahjen e fermerëve që merren me kultivimin e gurtit me 125 euro për hektarë, 100 euro për hektarë për kultivuesit e misrit e kështu me radhë.
Po ashtu, përkrahje do të ketë edhe për fermerët që merren me blegtori ku, respektivisht 50 euro për çdo krerë të lopëve qumështore si dhe do të përkrahen edhe fermerët të cilët kanë viça për majmëri.
Por, sivjet pagesat për fermerët përfitues janë duke u vonuar, ku sipas zyrtarëve të Ministrisë së Bujqësisë është ngërçi politik i krijuar pas zgjedhjeve të 8 qershorit dhe pamundësia e rishikimit të buxhetit të vitit 2014./FermaIme/Telegrafi/