Trajneri i Kombëtares së Shqipërisë, Edy Reja ka mbetur i kënaqur me lojën e ekipit të tij në udhëtim te Uellsi në ndeshjen miqësore të zhvilluar në Kardif.
Shqipëria barazoi pa gola 0-0 ndaj Uellsit, por trajneri italian u kuqezinjve ka mbetur i kënaqur me shumë aspekte të lojës.
“Më pëlqeu shumë sjellja e skuadrës. Erdhëm këtu me një dëshirë të madhe për të treguar aspektin e karakterit. Vuajtëm në pjesën e dytë, sepse ata futën një sulmues të fortë fizikisht dhe luajtën me topa të gjatë. Në pjesën e parë luajtëm mirë, por vuajtëm pak në sulm. Uellsi është skuadër shumë e fortë”, ka thënë fillimisht Reja pas ndeshjes.
“Luajmë shumë mirë në mbrojtje, por duhet të jemi më të shpejtë dhe më të saktë në kundërsulm. Në pjesën e parë bëmë mirë, por në të dytën vuajtëm pak. Kur skuadrat kundërshtare bëjnë presing dhe zhbalancohen duhet t’i godasim. Në pjesën e dytë duhet të jemi shumë të aftë në kundërsulm. Paraqitja mbetet pozitive”.
“Sulmuesit më pëlqyen të gjithë. Seferi pati pak hapësira, por luftoi shumë. Balaj luajti mirë në pjesën e parë. Manaj me topin është shumë i mirë, është nga sulmuesit më të mirë që kemi. Në përgjithësi më pëlqyen të katërt sulmuesit”.
FT/ Uells 🏴 0-0 Shqipëri 🇦🇱
.#ForcaShqipëria 💪🇦🇱 pic.twitter.com/5YUkQo7Ymx— FSHF (@FSHForg) June 5, 2021
“Dua të nënvizoj edhe faktin se Selmani, ishte debutues, por bëri paraqitje shumë të mirë. Gjetëm një lojtarë të ri që mund të na shërbejë në të ardhmen. Në topat në ajër ishte shumë mirë”.
“Në aspektin taktik të gjithë mbrojtësit bënë mirë. Sigurisht mund të kemi bërë ndonjë gabim të vogël në dalje, por në përgjithësi kemi bërë mirë. Duhet të kemi parasysh se luanim ndaj lojtarëve shumë cilësorë. Ata bënin shumë presing, janë shumë të fortë fizikisht. Gabimi i vetëm ishte vuajtja në pjesën e kundërsulmit. Në aspektin e karakterit treguam gjëra të mëdha. Nëse kishim më shumë siguri kur e nisnim aksionin, do të bënim akoma më mirë”, përfundoi italiani. /Telegrafi/