Në një hap të rëndësishëm drejt përmirësimit të infrastrukturës urbane, qyteti i Deçanit po përjeton një transformim të madh, duke u përgatitur për të mirëpritur një rrugë moderne dhe trotuare të gjera që do të ndryshojnë tërësisht pamjen e qytetit.
Punimet për ndërtimin dhe zgjerimin e rrugës në segmentin Isniq – Lëbushë – Strellc kanë filluar me entuziazëm të madh.
Ky projekt është pjesë e një përpjekjeje më të gjerë për të modernizuar infrastrukturën e Deçanit, duke i dhënë qytetit një pamje të re, bashkëkohore dhe funksionale.
Kryetari i Komunës së Deçanit, Bashkim Ramosaj,përmes një postimi në Facebook të cilën e ka shoqëruar edhe me disa fotografi, e cilësoi këtë iniciativë si një hap të shumëpritur për qytetarët dhe bizneset e zonës.
“Gjithë qendrës së Deçanit po i japim hakun që ka merituar ta ketë vite e dekada më parë. Së bashku Deçanit do t’i ndërtojmë infrastrukturën më moderne që meriton qyteti”, ka shkruar ndër të tjera Ramosaj transmeton Telegrafi.
Ky projekt pritet të sjellë përfitime të shumta për banorët dhe bizneset e zonës, duke rritur cilësinë e jetesës dhe mundësitë ekonomike në qytet. /Telegrafi/
