Themeluesi i WikiLeaks, Julian Assange do të bëjë paraqitjen e tij të parë publike që nga lirimi nga një burg britanik, kur ai të japë dëshmi në Këshillin e Evropës muajin e ardhshëm.
Assange, 53 vjeç, u kthye në Australi në qershor pasi u arrit një marrëveshje për lirimin e tij, kur pranoi se është fajtor për shkeljen e ligjit të spiunazhit të SHBA-së, duke i dhënë fund një odiseje ligjore 14-vjeçare, transmeton Telegrafi.
Gruaja e tij Stella, me të cilën u martua ndërsa ishte në një burg të sigurisë së lartë në Londër, tha se do t’i duhej pak kohë për të rifituar shëndetin dhe mendjen e tij pas burgimit të gjatë, si dhe për të qenë me dy fëmijët e tyre që nuk i kishte parë kurrë jashtë burgut.
Ai tani do të flasë në publik për herë të parë, kur të japë dëshmi në Komisionin për Çështjet Ligjore dhe të Drejtat e Njeriut të Asamblesë Parlamentare të Këshillit të Evropës (PACE) në Strasburg më 1 tetor.
Ai vjen pas një raporti të PACE për rastin e tij, i cili arriti në përfundimin se ishte i burgosur politik dhe bëri thirrje që Britania të zhvillonte një hetim nëse ai ishte ekspozuar ndaj trajtimit çnjerëzor.
“Do të jetë një pushim i jashtëzakonshëm nga rikuperimi i tij pasi (Këshilli i Evropës) e ftoi Julian të japë dëshmi për raportin e Komitetit për rastin e tij dhe implikimet e tij më të gjera”, tha Stella Assange në X. /Telegrafi/