Cristiano Ronaldo nuk ishte prezent në duelin që u zhvillua mes Anthony Joshua dhe Francis Ngannou, përkundër faktit që ai e kishte ulësen të rezervuar.
Shumë figura të njohura të sportit ishin prezent në këtë ngjarje madhorë të boksit që u mbajt në Arabinë Saudite.
Ish-trajneri i Real Madridit, Jose Mourinho, ishte prezent për të parë Joshuan teksa mori një fitore të madhe me një nokaut brutal ndaj Ngannou. Legjenda braziliane Ronaldo dhe ikona e Romës, Francesco Totti, ishin gjithashtu në mesin e yjeve të pranishëm në këtë event.
Por ylli i Al Nassr, Ronaldo, nuk ishte pjesëmarrës në këtë duel ani pse ai e kishte të rezervuar ulësen pranë këshilltarit Turki Alalshikh.
Ulësja e tij ishte shënjuar me ‘CR7’ por nuk kishte shenja se pesë herë fituesi i Topit të Artë ishte prezent në ‘Kingdom Arena’.
Duket se arsyeja që qëndron mbrapa kësaj është sepse Al Nassr kishte një seancë stërvitore mëngjesin e së shtunës. Klubi arab madje kishte postuar fotografi në rrjetet sociale, duke i shoqëruar ato me mbishkrimin: Nuk ka ditë pushimi.
Në këtë mënyrë, duket se 39-vjeçari i ka dhënë më shumë prioritet gjumit dhe stërvitjes, para duelit të Joshuas dhe Ngannou.
Megjithatë, në javën e ndeshjes, ai ishte takuar me Joshuan, Ngannou dhe Fury ku dhe ka shfrytëzuar rastin të bëjë një fotografi me ata./Telegrafi/
