Kosova pritet të ketë në dispozicion edhe tre futbollistë të tjerë.
Përfaqësuesja kosovare do të takohet në një miqësore me kombëtaren e Kamerunit dhe për kualifikimet e botërorit Islandën.
Albert Bunjaki, trajneri i Kosovës, ka thënë për indeksonline se pritet të ketë në dispozicion edhe Atdhe Nuhiun, Donis Avdiajn si dhe Florent Hadergjonaj.
“Tash jemi në fazën finale, kapitulli i kontunuitetit. 50 për qind e lojtarëve janë të rinj. Jemi duke pritur vetëm tre lojtarë të rinj, ata janë Donis Avdijaj, Atdhe Nuhiu dhe Florent Hadërgjonaj të cilët vetëm do t’i përmbushin dokumentacionet”.
Ai ka konfirmuar se edhe Besart Berisha, sulmuesi i Melbourne Victory, do të jetë i pranishëm në ndeshjet e muajit mars.
“Kam biseduar me Besart Berishën edhe më herët. Është bërë mirë që do të vij për Kosovën. Ai ka karakter fitues, përvojë të mirë. Dhe normal, është shumë i mirëseardhur në kobëtarën tonë një futbollist me përvojë”, tha Bunjaki.
Bunjaki ka folur edhe për ndeshjen e kualifikimet e botërorit dhe sfidën e radhës kundër Islandës.
“Islanda është kundërshtarë i fortë, dihet se çdo trajner lufton për rezultat pozitiv. Por, kemi të bëjmë me një kombëtare të fuqishme siç është Islanda e cila në Kampionatin Evropian doli shumë e suksesshme. Por me rëndësi është se jemi në ngritje të madhe, lojtarët dhe stafi ka fillua me njoftua njëri-tjetrin më mirë”, shtoi trajneri duke përfunduar “I gjithë fokusi nga tash deri më 25 mars është tek Islanda. Mund të ndodh që Kosova të ketë miqësore para Islandës, por më shumë vëmendjen e kam te ndeshja e 24 marsit kundër Islandë”.