Nga: Paola Minaccioni
Përktheu: Elona Caslli
Arti është punë, është djersë, duar të palara, jetë e ashpër, është lodhje.
Arti është punë dore, është rrezik, është studim, është mohim, është zotim, investim, sakrificë, nxehtësi, është zbulim, është rregull, është pasion.
Arti është fiksim, mani, shtrëngim, vendosmëri, mallkim, depresion.
Arti është dritësim, ngushëllim, arti është vëzhgim.
Arti është kuptim, arti është përqendrim, arti është shpërqendrim.
Art do të thotë t’i japësh trup një pamjeje, t’u japësh gëzim, t’u japësh kuptim, t’u japësh vlerë, t’u japësh rëndësi sekondave, minutave, orëve, ditëve dhe shekujve.
Art do të thotë t’i përkasësh pafundësisë. Arti e bën të padukshmen të dukshme.
Arti është frymëmarrje, është e qeshur, është rrahje e shpejtë zemre, është citim, është tronditje e rëndë, është rrëqethje, surprizë, frikë, dashuri, mahnitje, shpresë, trembje.
Arti është këtu dhe tani dhe kurrë rastësisht.
Arti është mister, arti është i pakonceptueshëm, është i paturp, është i dhunshëm, është i pahijshëm, është i parespektueshëm, është i egër, është i pathemeltë, është i pavetëdijshëm, është autonom, është kundra rrymës, është largpamës.
Arti nuk është i panevojshëm. Është i domosdoshëm dhe i ndashëm me të tjerë.
Arti është i nevojshëm.
Arti është çlirim, veprim, lëvizje. Arti është revolucion, është pështjellim.
Arti është provokim.
Arti është një gjest, jo domosdo qetësues, por edhe një vrajë shqetësuese.
Arti mund të jetë gjithçka, por nuk do të jetë kurrë indiferent!