Site icon Telegrafi

Arsenali kthehet te fitorja, demolon Crystal Palacen  

Shkumbin Pireva

Arsenali ka fituar me rezultat të pastër 5-0 në shtëpi ndaj Crystal Palace në ndeshjen e vlefshme për javën e 21-të në Ligën Premier.

Ekipi i Mikel Artetas është kthyer te fitorja në kampionat pas tri ndeshjeve, ku dy të fundit ishin humbje, pasi ka mposhtur Crystal Palace me lehtësi në Emirates.

Pjesa e parë e ndeshjes u karakterizua me dominim të vendasve, të cilët përveç rasteve të shumta arritën të shënojnë edhe dy gola.

Protagonisti kryesor ishte mbrojtësi Gabriel Megalhaes, i cili shënoi në minutën e 11-të me kokë për 1-0, ndërsa në minutën e 37-të ishte përsëri ai që shënoi për 2-0, por goli iu numërua portierit Dean Henderson pas një devijimi.

Edhe pjesa e dytë foli në të mirë të Arsenalit, i cili përveçse menaxhoi lojën, krijoi edhe raste tjera dhe shënoi tre gola tjerë, ku dy erdhën në shtesë.

Goli i parë në këtë pjesë erdhi në minutën e 59-të me anë të Leandro Trossard, i cili shënoi pas një kundërsulmi për 3-0.

Në minutat shtesë ishte Gabriel Martinelli, i cili ishte i papërmbajtshëm duke shënuar fillimisht për 4-0 dhe pastaj në minutën e pestë shtesë për rezultatin përfundimtar 5-0.

Pas kësaj fitore, Arsenali e sheh veten në pozitën e tretë me 43 pikë, po aq sa ka Manchester City i dyti dhe dy pikë më pak se Liverpooli i pari, por me një ndeshje më pak.

Në ndeshjen e ardhshme, Arsenali udhëton te Nottinghami, ndërsa Palace e pret Sheffield Unitedin. /Telegrafi/

https://twitter.com/YenksAbroad/status/1748690372052615392

https://twitter.com/VipArsenal/status/1748695902229856450

https://twitter.com/AbiolanaGod/status/1748707037087678833

Exit mobile version