Seanca e Kuvendit, deputetët do të debatojnë për problemet e banorëve shqiptarë në veri të Mitrovicës

Ka nisur seanca e Kuvendit të Kosovës ku deputetët pritet të mbajnë tri debate parlamentare dhe shqyrtojnë disa projektligje.

Deputetët do të diskutojnë lidhur me problemet e banorëve shqiptarë në veri të Mitrovicës dhe komunave të tjera në pjesën veriore, sa i përket pengesave që u bëhen për tu kthyer në pronat e tyre dhe pengesat për renovimin e shtëpive të djegura gjatë luftës.

Debati tjetër pritet të jetë në lidhje me personat e zhdukur, si dhe debati për sensibilizimin dhe masat që duhet të ndërmerren nga Qeveria dhe institucionet përgjegjëse në luftën kundër kancerit të gjirit.

Krahas kësaj deputetët do të shqyrtojnë në parim Projektligjin për të drejtat pronësore të shtetaseve të huaj.

Ndërkaq, do të shqyrtojnë Programin Kombëtar për Zbatimin e Marrëveshjes së Stabilizim-Asociimit (PKZMSA) 2020-2024. E po ashtu, do të shqyrtojnë raportin vjetor të Auditimit për vitin 2019.

Kjo seancë është vazhdimësi e seancës së javës së kaluar.