Banka “IMI” parashikon që klubi i Juventusit të humbë rreth 110 milionë euro në fund të sezonit, dëm ky i shkaktuar nga situata e krijuar nga coronavirusi.
Ndërprerja e kampionateve të futbollit ka filluar të sjellë pasojat në arkat e klubeve, një ndër të cilët është dhe “Zonja e Vjetër”.
Duke iu referuar raportit të kësaj banke, 45 milionë euro do të humbin nga të drejtat e transmetimit.
40 milionë euro do të humbin nga të drejtat e sponsorizimit dhe reklamave që do të anulohen dhe 25 milionë euro do të humbin nga të ardhurat e biletave.
Gjithsesi, duhet sqaruar se analiza ka parasysh skenarin më të keq, i cili përfshin anulimin e të gjitha ndeshjeve brenda dhe jashtë vendit për këtë sezon.
Duhet pasur parasysh se edhe pa efektin e coronavirusit ishte parashikuar një humbje prej 69 milionë dollarë në fund të sezonit për Juventusin. /Telegrafi/