Barcelona u desh të kënaqet me një barazim 2-2 në udhëtimin e tyre për derbin lokal ndaj Espanyolit në ndeshjen e vlefshme për javën e 19-të në La Liga.
Skuadra e Ernesto Valverdes ishte shumë afër një fitoreje të madhe me rikthim ndaj rivalit të urryer lokal, por u ndëshkuan në fund dhe barazuan.
Pjesa e parë e ndeshjes u karakterizua me dominim të Barcelonës, por ishin vetëm vendasit që shënuan gol.
Goli i vetëm në këtë pjesë erdhi në minutën e 23-të dhe ishte David Lopez, i cili shënoi me kokë për 1-0, ndërsa për Barcelonën rastin më të mirë e pati Luis Suarez (42’), por goditja e tij u ndal nga shtylla.
Në pjesën e dytë, Barcelona hyri me krejt tjetër fytyrë duke shpeshtuar sulmet dhe duke gjetur dy gola të shpejtë për të kthyer rezultatin.
Fillimisht ishte Suarez (50’) që shënoi për 1-1 pas asistimit të Jordi Albas, ndërsa Arturo Vidal (59’) shënoi me kokë për 1-2.
Në vazhdim të ndeshjes, vendasit u ngjallën në kërkim të golit të barazimit dhe atë e gjetën në fund të ndeshjes, falë edhe daljes jashtë të Frenkie De Jong (75’) me karton të kuq.
Ishte kinezi Lei Wu (88’), i cili shënoi për barazimin 2-2 dhe vulosi rezultatin përfundimtar të takimit.
Pas këtij barazimi, Barcelona gjendet në vendin e parë me 40 pikë, po aq sa ka Real Madridi i dyti, ndërsa Espanyol renditet i fundit me 11 pikë.
Në ndeshjen e radhës, Blaugranët e presin Granadan, ndërsa Espanyoli udhëton te Villarreali. /Telegrafi/
https://twitter.com/your_vo/status/1213572430482067456
https://twitter.com/TurfTape/status/1213573384111411201
https://twitter.com/reis_resenha/status/1213578253077798913