ATK: Nga 1 nëntori deklarimi dhe pagesa e tatimit përmes sistemit elektronik

Pas kësaj date, deklarimi dhe pagesa për tatimin në paga dhe kontribute pensionale do të bëhet vetëm përmes sistemit elektronik - EDI.

ATK bën të ditur përmes një komunikate se nga data 1 nëntor 2012 mënyra e deklarimit elektronik të tatimeve - përmes EDI-t, do të jetë forma e vetme e deklarimit për të gjithë tatimpaguesit, nga të cilët kërkohet të deklarojnë tatimin në paga dhe kontribute pensionale.

Ky proces është duke funksionuar në nivelin të duhur dhe është vlerësuar lartë si nga komuniteti i biznesit, ashtu edhe nga palët e tjera të interesit.

Sa u përket tatimpaguesve të cilët tashmë janë të regjistruar në sistemin EDI, që nga muaji tetor obligohen që të shkarkojnë edhe njëherë mostrën e listës së pagave, e cila është modifikuar duke përfshirë kolonat shtesë, ku mund të deklarohen edhe kontributet suplementare. /Telegrafi/