Aktivisti palestinez ngre padi prej 20 milionë dollarësh kundër administratës Trump

Aktivisti palestinez Mahmoud Khalil ka ngritur një padi kundër administratës Trump për 20 milionë dollarë dëmshpërblim pasi kaloi muaj të tërë në një qendër paraburgimi për emigrantë dhe humbi lindjen e fëmijës së tij të parë.

Departamenti i Sigurisë Kombëtare, Zbatimi i Imigracionit dhe Doganave të SHBA-së (ICE) dhe Departamenti i Shtetit janë të gjithë të emëruar në padi.

"Ky është hapi i parë drejt përgjegjësisë. Asgjë nuk mund të rikthejë 104 ditët që më janë vjedhur. Trauma, ndarja nga gruaja ime, lindja e fëmijës tim të parë që u detyrova ta humbisja. Por le të jemi të qartë, e njëjta qeveri që më shënjestroi për shkak se fola hapur po përdor dollarët e taksapaguesve për të financuar gjenocidin e vazhdueshëm të Izraelit në Gaza", tha Khalil në një njoftim për shtyp.

I diplomuari i Universitetit Columbia, 30 vjeç, i cili ishte një nga negociatorët kryesorë gjatë protestave në kampet e Universitetit Columbia kundër luftës në Gaza.

Kur kampet filluan në Universitetin e Kolumbias në pranverën e vitit 2024, Khalil nuk mori pjesë vetë në to, duke zgjedhur në vend të kësaj të negocionte me administratorët dhe t'u ofronte udhëzime studentëve.

Khalil kaloi 104 ditë në një qendër paraburgimi pasi u ndalua nga agjentët e ICE me rroba civile jashtë apartamentit të tij dhe u dërgua më shumë se 1000 kilometra larg në Jena, Luiziana, në jug të SHBA-së, ku gruaja e tij, miqtë dhe ekipi ligjor nuk kishin qasje tek ai, shkruajnë mediat e huaja.

Më 20 qershor, një gjyqtar federal amerikan në New Jersey urdhëroi lirimin e Khalil nga paraburgimi, ndërsa administrata Trump vazhdon të përpiqet të deportojë banorin e përhershëm ligjor i cili është i martuar me një shtetase amerikane.

Khalil tha se do t'ua shpërndajë çdo shumë parash të zgjidhjes viktimave të tjera të administratës Trump, të drejtat kushtetuese të të cilave për lirinë e fjalës janë shkelur në lidhje me avokimin për Palestinën.

Ai tha gjithashtu se do të ishte i lumtur të pranonte një kërkimfalje zyrtare, në vend të një zgjidhjeje, dhe një rishikim të politikave të qeverisë për deportim.

"Qëllimi im nuk është pasurimi vetjak. Nuk i dua këto para vetëm sepse kam nevojë për para. Ajo që dua është llogaridhënie e vërtetë. Llogaridhënie e vërtetë, e vërtetë kundër padrejtësive që ndodhën kundër meje me ndjekjet penale dashakeqe për të cilat u shënjestrova për të gjitha këto", tha Khalil.

Ndryshe, pasi presidenti amerikan Donald Trump nënshkroi një urdhër ekzekutiv në janar që kërkonte të deportonte studentët dhe pedagogët për fjalime pro-palestineze, Khalil ishte një nga studentët e parë që u ndalua. /Telegrafi/