Një deklaratë e kreut të OVL UÇK-së, Faton Klinaku ka shkaktuar përplasje mes akterëve politikë.
Deputeti i LVV-së deklaroi se kreu i OVL-së së UÇK-së, Faton Klinaku, përherë ka vepruar dhe vepron në koordinim të hapur me agjendën politike të PDK-së.
“OVL në krye me të ishte dhe është instrument politik i PDK-së. Faton Klinaku është ndërgjegjja e kulluar e PDK-së, instinkti i saj pa mbulesën e gjuhës së matur. Pse ndër mijëra fjalë për të ilustruar një mendim, ai zgjodhi pikërisht fjalën vrasje? Kjo fletë shumë. Është dëshmia e qartë se PDK në regjistrin e saj të metodave ende nuk e ka braktisur vrasjen si mjet ndaj kundërshtarëve të vet”, tha Abrashi.
I menjëhershëm ka qenë reagimi nga partia opozitare që u atakua nga Abrashi.
Sekretari organizativ i Partisë Demokratike të Kosovës (PDK), Betim Gjoshi, tha se një deklaratë e tillë nga Abrashi është shpifëse dhe po të mos ishte “kaq absurde, e ligë dhe fyese, do të ishte qesharake”, teksa paralajmëroi veprime ligjore ndaj deputetit të shumicës.
“PDK tashmë ka përgatitur padinë për shpifje ndaj deputetit Artan Abrashi, e cila do t’u dorëzohet organeve të drejtësisë. Me shpifje të tilla do të merret vetëm drejtësia dhe ne presim që të gjithë, pa përjashtim, edhe zyrtarët publikë, të marrin dënimin e merituar”, shkroi Gjoshi.
Tutje, ai tha se asnjë deklaratë e tillë si e Abrashit nuk do të arrijë të mbulojë humnerën që sipas tij, ka rënë pushteti aktual.
“Koordinimin me kriminelët serbë, vjedhjen e rezervave shtetërore, hajninë me energjinë, trafikimin e lëndëve narkotike dhe keqqeverisjen – nuk kanë më fuqi dhe kredibilitet, as moral e as politik, që ta mbrojë askush – aq më pak një deputet i dobët si Artan Abrashi”, tha ai.
