Hana Xhemajli nga Fondacioni Friedrich Ebert Stiftung (FES) ka thënë se temat e mëdha e kanë lënë në harresë qytetarin e Kosovës dhe problemet e përditshme me të cilat përballet ai.
Xhemajli, në emisionin “Përballje” me gazetarin Muhamet Hajrullahu në RTV Dukagjini, ka thënë se tema si shëndetësia, edukimi, aktivizmi qytetar, mirëqenia sociale e zhvillimi ekonomik mbesin shumë poshtë prioriteteve nga institucionet, pavarësisht se me to qytetari përballet çdo ditë.
Përfaqësuesja nga Fondacioni Friedrich Ebert Stiftung (FES) ka thënë se qytetarët duhet ta dinë se fuqia e tyre është shumë më e madhe se e politikanëve pasi ata janë shumicë dhe vetëm me votën e tyre politikanët vijnë në pushtet.
“Derisa qytetari nuk e kupton që ka më shumë fuqi se politikanët, jemi ku jemi. Në vendet evropiane qytetari është shumë i vetëdijshëm për taksën që e paguan ndaj shtetit”, tha ajo, përcjell Telegrafi.
Xhemajli thotë se është e pakuptimtë që qytetarët që adresojnë ankesa kundër këtyre politikanëve votojnë përsëri të njëjtët.
Përfaqësuesja nga Fondacioni Friedrich Ebert Stiftung (FES) shton se në Kosovë ka ardhur koha që qytetari t’ua imponojë prioritetet subjekteve politike e jo politikanët t’u prezantojnë qytetarëve platformat e tyre sipas prioriteteve që ata duan.
“Qytetarët ishte dashur që në takimi me politikanët para zgjedhjeve t’u thonë se “ne kemi dëgjuar për “Kosovën që duam”, për shëndetësinë e edukimin, por ne po duam “këtë”. A e bëni këtë?”. Nëse “jo” atëherë leje këtë punë se nuk është për ty. Nëse “po” atëherë e ke votën time”, tha ndër të tjera Hana Xhemajli./Telegrafi/