Maurizio Sarri duket se po e mendon largimin nga Chelsea në ditët e ardhshme, duke qenë se shërbimet e tij është duke i kërkuar Juventusi.
Sipas The Times, trajneri italian dhe klubi londinez pritet të arrijnë një marrëveshje të përbashkët për largim, vetëm pas 11 muajsh qëndrimi në krye të skuadrës.
Sarri ishte kritikuar nga tifozët e Chelseat për mënyrën e lojës së tij dhe për rezultatet negative nga mesi i sezonit, por në fund arriti ta fitonte Ligën e Evropës, e kualifikoi skuadrën në Ligën e Kampionëve dhe ishte në finale të EFL Cup (Carabao Cup).
Por, sipas të përditshmes angleze, Sarri dhe Juventusi janë takuar të premten e javës së kaluar për ta mbyllur marrëveshjen e rikthimit në Itali.
Kjo do të thotë që Zonja e Vjetër do të jetë e gatshme ta prezantojë trajnerin italian në ditët e ardhshme, pas takimit në fundjavën e kaluar.
Juventusi pritet që t’ia paguajë Chelseat gjashtë milionë euro si dëmshpërblim të prishjes së kontratës para kohë të Maurizio Sarrit, në mënyrë që të finalizohet marrëveshja, e që do ta zëvendësojë Massimiliano Allegrin që u largua pas pesë vitesh nga klubi. /Telegrafi/