Drejtori i Agjencisë së Kosovës për Inteligjencë, Petrit Ajeti ka raportuar me dyer të mbyllura të mërkurën në Komisionin për Mbikëqyrjen e AKI-së.
Pas përfundimit të mbledhjes, anëtari i komisionit, deputeti i LVV-së, Salih Zyba, tha se është diskutuar edhe për pretendimet për planifikim të atentatit ndaj kryeministrit Albin Kurti, gjatë qëndrimit të tij javë më parë në Shkup të Maqedonisë së Veriut.
Megjithatë, Zyba nuk pranoi të jap detaje nga ky diskutim, derisa tha se kjo çështje është e konsumuar dhe s’ka nevojë për alarmim.
“Ka pasur diskutim, por nuk ka diçka të veçantë, as porosi as anëtarëve të tjerë të komisionit, meqenëse nuk ka diçka të veçantë nuk është as për alarmim dhe as adresim i këtij momenti…
Alarm është tjetër vend, por jo këtu. Nga ky komision nuk ka diçka për të ndarë me medie dhe publikun diçka. Më vjen keq është çështje e konsumuar”, theksoi ai, raporton kp.
Duke folur për ndikimet ruso-serbe në Kosovë, Zyba tha rreziku prej Serbisë është permanent çdo herë, andaj niveli i përgjegjësisë shtetërore duhet të jetë i lartë.
“Dihet qëndrimi i Rusisë dhe Serbisë në raport me shtetin e Kosovës dhe interesat e saj. Nuk diçka të veçantë, mbeten vende armiqësore dhe agresive në secilin prej rasteve të mundshme”, tha Zyba.