Luka Modric ka bërë një krahasim midis humbjes së Real Madridit me largimin e Cristiano Ronaldos dhe largimit të mundshëm të Lionel Messit nga Barcelona.
Kalimi i Portugezit në Juventus më 2018 u pasua nga një sezon zhgënjyes për Real Madridin, pavarësisht fitimit të Superkupës Evropiane, por Los Blancos u rikuperuan në sezonin 2019/20 duke fituar Superkupën e Spanjës dhe La Ligan.
Largimi i radhës i madh nga La Liga mund të jetë Messi dhe Modric ka thënë se ky largim do të jetë i ngjashëm sikurse ai i Ronaldos nga Real Madridi.
“Do të ishte një humbje e madhe, sikur Cristiano kur u largua nga Real Madridi”, ka thënë fillimisht Modric për AFP.
“Por, ju nuk mund të mendoni për të kaluarën. Është futboll dhe kaq”.
“Kjo do të jetë një humbje e madhe për prestigjin e ligës. Por, ne duhet të shkojmë përpara. Lojtarët e tjerë do të bëhen yje”.
“Kur Cristiano u largua, e njëjta gjë ndodhi; jeta e Real Madridit vazhdoi pa të dhe do të jetë e njëjta gjë për Barcelonën dhe La Ligan pa Messin”, përfundoi kroati.
Ditëve të fundit janë përfolur shumë klube të cilat mund ta transferojnë Messin, por së fundmi kanë dalë edhe lajme se ai mund të mbetet në Camp Nou. /Telegrafi/