Komuna e Podujevës përmes një njoftimi ka bërë të ditur se persona të pandërgjegjshëm po vendosin batanije sensorët e vendosur në shtyllat e ndriçimit publik dhe si pasojë në disa vende ndriçimi publik po qëndron i ndezur edhe gjatë ditës.
Komuna e Podujevës në një postim në Facebook shkruan se informacionin e kanë përcjellë në drejtoritë përkatëse të cilat do t’i ndërmarrin të gjitha veprimet e nevojshme për parandalimin e këtyre veprimeve.
“Të nderuar qytetarë,
Jemi të njoftuar nga qytetarët që në disa lokacione të qytetit, në senzorët e vendosur në shtyllat e ndriçimit publik, persona të pandërgjegjshëm po vendosin batanije, dhe si pasojë disa vende ndriçimi publik po qëndron i ndezur edhe gjatë ditës.
Informacionin e kemi përcjellur në drejtoritë përkatëse të cilat do t’i ndërmarrin të gjitha veprimet e nevojshme për parandalimin e këtyre veprimeve”, thuhet në njoftim.
Ndryshe, një ditë më parë Kuvendi ka shpallur gjendjen emergjente me energji elektrike, që do të jetë në fuqi 60 ditë.
Javët e fundit vendi është përballur me krizë energjetike, ndërsa javë më parë kryeministri i vendit, Albin Kurti në një konferencë për media u pyet nga gazetarët se me çka po ngrohet, teksa tha se në shtëpinë e tij është ngrohur me batanije. /Telegrafi/
